நீங்கள் தேடியது "வேலைநிறுத்த போராட்டம்"

சென்னை:

தமிழகம் முழுவதும் உள்ள ரேஷன் கடை ஊழியர்கள், தங்களுக்கு சம வேலைக்கு சம ஊதியம் வழங்க கோரி நாளை வேலைநிறுத்த போராட்டத்தில் ஈடுபட உள்ளனர்.

இது குறித்து தமிழ்நாடு கூட்டுறவு நியாயவிலைக்கடை (ரேஷன் கடை) அனைத்து தொழிற்சங்கங்களின் கூட்டமைப்பு சார்பில் வெளியிடப்பட்டுள்ள செய்திக் குறிப்பில் கூறியிருப்பதாவது:-

ரேஷன் கடை ஊழியர்கள் நியாயமான கோரிக்கைகளை வலியுறுத்தி கடந்த 6 மாதத்திற்கும் மேலாக தொடர்ந்து கவன ஈர்ப்பு போராட்டங்களை நடத்தி வருகிறோம்.

கடந்த பிப்ரவரி 24-ந் தேதி கூடிய அனைத்து தொழிற்சங்க கூட்டமைப்பு கூட்டத்தின் தீர்மானத்தின் படி, மார்ச் 9-ந் தேதி சென்னையில் ஆர்ப்பாட்டம் நடத்தப்பட்டது. அந்த ஆர்ப்பாட்டத்தின் இறுதியில் ஒரு நாள் வேலைநிறுத்தம் செய்வது என்றும், அதற்கு முன்னதாக மாநிலம் முழுவதும் வேலைநிறுத்த தயாரிப்பு மண்டல மாநாடுகளை நடத்துவது என்றும் முடிவு செய்யப்பட்டது.

அதன்படி ஏப்ரல் 15-ந் தேதி முதல் ஜூன் 24-ந் தேதி வரை 10 மண்டல மாநாடுகள் நடைபெற்றது. விருகம்பாக்கம் மாநாட்டில், ஆகஸ்டு 6-ந் தேதி(நாளை) திங்கட்கிழமை வேலைநிறுத்தம் செய்வது என முடிவு செய்யப்பட்டது.

கூட்டுறவுத்துறை அதிகாரிகளுடன் நடத்திய பேச்சுவார்த்தையில், ரேஷன் கடை ஊழியர்களின் பிரதான கோரிக்கைகளாக உள்ள சம வேலைக்கு சம ஊதியம், ஒரே துறை, எடை குறைவு இல்லாமல் பொருட்கள் வழங்குதல், சேதாரக் கழிவு அனுமதித்தல், பணி வரன்முறை, மானியத் தொகை விடுவித்தல் உள்பட பல்வேறு கோரிக்கைகளுக்கு எவ்வித தீர்வும் காணப்படவில்லை.

இந்நிலையில் தமிழ்நாடு முழுவதும் உள்ள கூட்டுறவு நியாய விலைக்கடை ஊழியர்கள் அனைவரும் 6-ந் தேதி(நாளை) வேலைநிறுத்தத்தில் ஈடுபடுகின்றனர். எனவே அன்று ரேஷன் கடைகள் திறக்கப்பட மாட்டாது.

இவ்வாறு அதில் கூறப்பட்டுள்ளது. #tamilnews

ஊட்டி:

அகில இந்திய கிராமப்புற அஞ்சல் ஊழியர்கள் சங்கம் சார்பில், கிராம அஞ்சல் ஊழியர்களுக்கு 7–வது ஊதியக்குழுவை அமல்படுத்த வேண்டும், கிராம அஞ்சல் ஊழியர் சங்க உறுப்பினர் சரிபார்ப்பு முடிவினை உடனே வெளியிட வேண்டும் ஆகிய கோரிக்கைகளை வலியுறுத்தி இந்தியா முழுவதும் கடந்த 22–ந் தேதி முதல் கிராம அஞ்சல் ஊழியர்கள் காலவரையற்ற வேலைநிறுத்த போராட்டத்தில் ஈடுபட்டு வருகின்றனர்.

நீலகிரி மாவட்டம் ஊட்டி, குன்னூர், கோத்தகிரி உள்பட பல்வேறு பகுதிகளில் இருந்து கிராம அஞ்சல் ஊழியர்கள் ஊட்டியில் உள்ள தலைமை தபால் அலுவலகம் முன்பு திரண்டனர். பின்னர் அவர்கள் தங்களது கோரிக்கைகளை நிறைவேற்ற வலியுறுத்தி தலைமை தபால் அலுவலகம் முன்பு வேலைநிறுத்த போராட்டத்தில் ஈடுபட்டனர். போராட்டத்துக்கு கோட்ட செயலாளர் சக்ரவர்த்தி தலைமை தாங்கினார். சங்க நிர்வாகிகள் சந்திரன், சித்ராதேவி ஆகியோர் முன்னிலை வகித்தனர். போராட்டத்தின் போது கிராம அஞ்சல் ஊழியர்களுக்கு 7–வது ஊதியக்குழுவை அமல்படுத்த வேண்டும் என்று வலியுறுத்தப்பட்டது. இதில் நிர்வாகிகள் ரேச்சல் மோசஸ், சந்திரமோகன் உள்பட பலர் கலந்துகொண்டனர்.

கிராம அஞ்சல் ஊழியர்களின் போராட்டம் குறித்து சங்க பிரதிநிதிகள் கூறியதாவது:–

அகில இந்திய அளவில் கிராம அஞ்சல் ஊழியர்கள் கோரிக்கைகளை வலியுறுத்தி கடந்த 22–ந் தேதி முதல் காலவரையற்ற வேலைநிறுத்த போராட்டத்தில் ஈடுபட்டு வருகிறார்கள். ஆனால், எங்களது போராட்டத்தை சம்பந்தப்பட்ட அதிகாரிகள் கண்டுகொள்ளவில்லை. இதுதொடர்பாக சங்க பிரதிநிதிகளை அழைத்து பேச்சுவார்த்தை நடத்த முன்வரவில்லை. எனவே, கோரிக்கைகளை நிறைவேற்ற மத்திய அரசு நடவடிக்கை எடுக்க வேண்டும்.

நீலகிரி மாவட்டத்தில் கிராம அஞ்சல் ஊழியர்களின் போராட்டத்தால், கிராமப்புறங்களில் உள்ள அனைத்து கிளை தபால் அலுவலகங்களும் கடந்த 11 நாட்களாக பூட்டு போட்டு மூடப்பட்டு உள்ளன. இதுவரை மாவட்டம் முழுவதும் சுமார் 2 லட்சம் தபால்கள் பட்டுவாடா செய்யப்படாமல் தேங்கி உள்ளது. இதனால் வேலைக்கான அழைப்பு கடிதம், பாஸ்போர்ட், ஆதார் கார்டு உள்ளிட்ட முக்கிய தபால்கள் கிடைக்காமல் பொதுமக்கள் கடுமையாக பாதிக்கப்பட்டு உள்ளனர். கிராமங்களில் உள்ள கிளை தபால் அலுவலகங்கள் மூலம் தான் 60 சதவீத வருமானம் துணை தபால் அலுவலகம் மற்றும் தலைமை தபால் அலுவலகத்துக்கு வருகிறது. இவ்வாறு அவர்கள் கூறினர்.

நெய்வேலி:

கடலூர் மாவட்டம் நெய்வேலி என்.எல்.சி.யில் ஒப்பந்த தொழிலாளர்கள் சுமார் 10 ஆயிரம் பேர் பணியாற்றி வருகிறார்கள். சுரங்கம் 1ஏயில் பல ஆண்டு காலமாக பணியாற்றி வந்த சிலர் இடமாற்றம் செய்யப்பட்டனர்.

மேலும் பணிநாட்கள் 26 நாட்களுக்கு பதிலாக 15 நாட்கள் பணி வழங்கப்பட்டது. இதற்கு எதிர்ப்பு தெரிவித்து ஒப்பந்த தொழிலாளர்கள் பல்வேறு போராட்டம் நடத்தி வந்தனர்.

இந்தநிலையில் நேற்று என்.எல்.சி.சுரங்கம் 1ஏ முன்பு ஒப்பந்த தொழிலாளர்கள் சிலர் போராட்டம் நடத்த வந்தனர். பின்னர் 25 பேர் திடீரென்று வி‌ஷத்தை குடித்து கீழே மயங்கி விழுந்தனர்.

உடனே அவர்களை மீட்டு என்.எல்.சி.ஆஸ்பத்திரிக்கு கொண்டு சென்றனர். அவர்களில் 6 பேரின் நிலைமை மோசமாக இருந்தது. அவர்களை புதுவையில் உள்ள தனியார் ஆஸ்பத்திரிக்கு கொண்டு சென்றனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது.

இந்தநிலையில் இன்று காலை ஒப்பந்த தொழிலாளர்கள் 700 பேர் சுரங்கம் 1ஏ பகுதிக்கு வந்தனர். பின்பு அவர்கள் பணிக்கு செல்லாமல் வேலைநிறுத்த போராட்டத்தில் ஈடுபட்டனர். இதுகுறித்து அவர்கள் கூறும்போது,

வேலைநாட்கள் குறைக்கப்பட்டதை கண்டித்தும், பணிமாற்றம் செய்யப்பட்டவர்களை மீண்டும் அதே இடத்துக்கு பணியில் அமர்த்த வேண்டும் என்றனர்.

இதற்கிடையே இன்று மாலை மாவட்ட கலெக்டர் தண்டபாணி என்.எல்.சி.ஒப்பந்த தொழிலாளர்களுடன் பேச்சு வார்த்தை நடத்துகிறார். #Tamilnews